Село Будимирци, Мариово
Според легендата село Будимирци во минатото било распослано на две локации познати како Долно и Горно Будимирци.
Жителите се занимавале со сточарство и стоката често им забегувала на местото на денешното село, поради изворите на вода и поволните климатски услови. Така постепено жителите од двете места ја населиле денешната локација и се формирало селото.
Името на селото потекнува од древното словенско име Будимир (“буди” + “мир”) што би можело да значи “будење во мир” или “да се биде во мир”.
Во 1961 година во село Будимирци живееле 521 жител, од кои денес се останати помалку од 10 постојани жители. Слава на селото е Петковден (27 Октомври).
Во селото се наоѓа храмот „Св. Николај Чудотворец“ (1875-78 год) и храмот на „Св. Димитриј“ во поранешното село Трново. Во близина на селото минува реката Белица, која со својата боја и чистина претставува вистинска атракција за љубителите на природата и омилено место за разладување на локалното население.
