Камен мост, село Зовиќ, Мариово

Изграден од делкани камени блокови, Камениот мост во село Зовиќ е препознатлив симбол на регионот Мариово. На ова место претходно имало дрвен мост, кој се преполовил под товарот на еден локален селанец – Велко Трајковски, кој преку мостот водел воловска кола.

Stone Bridge village Zovikj

Велко заедно со колата и воловите паднале во реката, но и покрај сериозните повреди на ᾽рбетот, тој преживеал и со одреден степен на инвалидитет доживеал и длабока старост.

На местото на срушениот дрвен мост, селото решило да изгради камен мост, за да се обезбеди стабилна врска на селото со имотите од другата страна на реката. Камениот мост бил изграден во 1955/56 година, а мајстор бил извесен Џуладин, по потекло од село Лабуништа, струшко, кој заедно со своите работници живеел во селото додека се градел мостот и секоја куќа имала задача одреден период да се грижи и да ги храни мајсторите.

Истражете - 360 интерактивно видео

Мостот стана познат по филмовите кои Милчо Манчевски, најпознатиот филмски режисер во Македонија, ги сними на ова место и оттогаш го добива епитетот „Филмски“.

Во 2014 година преку проект финансиран од Европската Унија, мостот е реставриран и го добива својот сегашен лик.

Веднаш пред Камениот мост на висока карпа се наоѓа живопис со приказ на свети Ѓорѓи, кој датира од 1925 година. На живописот централно е поставена фигурата на свети Ѓорѓи на бел коњ, со развиорена црвена наметка, како го убива аждерот. Живописот е реставриран во 2006 година.

Stone Bridge village Zovikj
Feel free to share this